رحلة اليوم الواحد الى الاسكندرية

 رحلة يوم واحد الى الاسكندرية 

فى مواضيع كتير بتتكلم عن الاسكندرية وجمالها
لكن احنا حنتكلم عن ازاى نروح يوم واحد للاسكندرية ونعمل كل حاجة وننبسط ونرجع تانى فى نفس اليوم عشان لو عندنا شغل او اى ظرووف تانية                                   

  اولا  ازاى بقى نروح الاسكندرية

الطريق الى الاسكندرية سهل وبسيط ولكن حسب انت حتروح أزاى 

يعنى لو حتروح بالسيارة الطريق بسيط وجميل 

الطريق بسيط جدا كل الى عليك لو انت من سكان القاهرة حتطلع من الدائرى من الاتوستراد حتلاقى منزل دار السلام والمنزل الى بعدة منزل البحر المعظم والمنزل الثالث يو ترن والمنزل الرابع المريوطية والخامس المنصورية كل الى عليك حتنزل فى المنزل الخامس وحتفضل ماشى مع الطريق على طول لغاية ماتوصل شارع الهرم حتلف شمال اكنك بالظبط رايح الهرم وبعد كدة حتلاقى لوحات مكتوب عليها ميدان الرماية وطريق الاسكندرية الصحراوى بس كل الى عليك حتمشى معها لغاية ماتوصل الاسكندرية انشاء الله 
طبعا دة الطريق العام لو انت من مكان أخر من القاهرة ممكن بقى تستخدم GBS
وأكيد حتوصل برضة 

ودى شوية صور للطريق 

وممكن برضة تروح عن طريق القطار 

 انا بفضل القطارات لانك حتوصل مرتاح وتقدر تواصل اليوم وتكون مستكنيص
كل الى عليك انك تروح محطة القطار وتحجز تذكرة بس ياريت تكون من بدرى قبل الرحلة بخمس ايام على الاقل عشان تلاقى حجز وطبعا يفضل انك تركب قطار من بدرى جدا(7الصبح) مثلا عشان نلحق نروح ونيجى وننبسط

ودة موقع سكك حديد مصر عشان تشوف الميعاد الى يناسبك 
                                      سكك حديد مصر
            
ثانيا حنعمل ايية بقى فى الاسكندرية

* اول حاجة بحب اعملها اكيد افطر طيب نفطر فين مش معقول نبقى فى الاسكندرية ومترحشى لمطعم (محمد أحمد) دة مطعم تاريخى فاتح فى الاسكندرية من زمان جدا تاريخ يعنى ولازم طبعا تجرب الجبنة المقلية دة طبعا مع الفول والطعمية الاحسن انك تقعد عندة عشان يهتم وتجيب كل الى نفسك فية طبعا الاكل هناك لة طعم تانى مش حقدر أوصفلك لازم تجرب بنفسك
                   


ازاى بقى نروح لمطعم محمد أحمد !!!!!!!!!
وهنا لازم ننزل محطة مصر عشان فى محطة سيدى جابر ومحطة مصر عشان نروح مطعم محمد احمد ننزل محطة مصر
وممكن برضة ننزل محطة سيدى جابر ونركب الترام أمام محطة القطار وننزل فى محطة الرمل وطبعا الترام دى فسحة لوحدها حتتفرج على أحياء الاسكندرية من الداخل 
ودى صور الفطار بالهنا والشفاء 😍😙😍😍

وبعد كدة عشان احنا لسة فى منطقة محطة الرمل يبقى يمكن ممكن لو عاوزين نشترى لبس او اى حاجة هناك منطقة حلوة جدا للشوبينج فى هناك محلات كتير جدا وكمان تشكيلة حلوة من الملابس الرجالى والحريمى.

.وطبعا بعد ما فطرنا يبقى لازم نشرب قهوة فى هناك فى محطة الرمل  أحسن مطحن بن فى الاسكندرية
مطحن بن سيفانو بولو المطحن دة عريق جدا يعتبر مطحن تاريخى تأسس عام 1932

حكيلكم نبذة مختصرة عن المطحن عشان تتشجعوا وتروحوا تشربوا القهوةهناك ☕☕☺☺☺
وتتصوروا كمان 📷📷

مطحن سيفانو بولو يقع هذا المطحن فى شارع سعد زغلول عند محطة الرمل وطبعا الى يميز المطحن دة عن غيرة رائحة البن المنعشة حتسنشقها من اى مكان فى شارع سعد زغلول .

زار المطحن العديد من الشخصيات التاريخية مثل الراحل انور السادات.

ودى شوية صور لسيفانو بولو وكمان فنجان القهوة

فالافضل ياريت اننا نروح كلنا نشرب فنجان قهوة هناك اكيد حنكون مبسوطين ومصحصحين لباقى الرحلة عشان كمان لسة اليوم طويل ومليان مفاجئات
وعشان احنا لسة فى محطة الرمل يبقى لازم ناخد جولة فيها لانها منطقة قديمة والبحر كمان جنبها حاجة تانية.

 ودى شوية صور لمحطة الرمل

طبعا بعد ما فطرنا وشربنا القهوة لازم بقى نتفسح ونستكنيص
حقولكم على أكثر من بديل عشان تختاروا انتوا البديل الى يعجبكم

* نروح البحر

ازاى بقى نروح امامك طريقتين 

1- لو معاك عربية حتروح من محطة الرمل الى الشاطىء الى انت أختارتة عن طريق الكورنيش ودى فسحة لوحدها.

2-انك تروح عن طريق التاكسى او الميكروباص تركب من محطة الرمل وتنزل فى الشاطىء وكلة عن طريق الكورنيش وعلى فكرة الموصلات فى الاسكندرية لذيذة مش متعبة أوووى .

فى اكثر من شاطى يعنى مثلا فى شاطىء المعمورة او المنتزة ودى تعتبر الشواطىء النظيفة والجميلة واغلها تكلفة

وفى شواطىء اخرى مثل سيدى بشر وميامى والمندرة واقلهم تكلفة من حيث سعر 
التذكرة والشمسية
وطبعا دى صور لمجموعة شواطىء

* شاطىء المعمورة 

* شاطىء المنتزة 

* شاطىء سيدى بشر 

* صخرة ميامى 

                                 ودى طبعا  قلعة قايتياى

قلعة قياتباى من القلاع التاريخية توجد فى الاسكندرية فى منطقة بحرى والذى قام ببناءها السلطان الاشرف قايتباى وتم انشاءها عام 1477 واستغرق بناءها سنتين وهى من المزارات الجميلة فى الاسكندرية عشان موقعها جميل جداتطل على البحر من جميع النواحى .

  من الجميل ايضا فى منطقة القلعة انك لو بتحب الصيد ممكن تصطاد هناك عشان    يوجد ممر طويل على البحر ممكن تقعد على الممر وتصطاد أحلى سمك من هناك

كل الى عليك تختار الشاطىء بس نصيحة منى لازم تجرب وتنزل البحر بيخلصك من الطاقة السلبية وبتطلع بجد انسان جديد ومستكنيص 😊😊 

ترام الاسكندرية 
من الممتع واللذيذ انك تخلى وسيلة التنقل فى الاسكندرية تكون عن طريق الترام 
لانة الترام يعتبر فسحة فى حد ذاتها وليس وسيلة تنقل فقط 
وكمان عشان انكحتلف داخل احياء الاسكندرية والترام يأخذك من اول الاسكندرية حتى أخرها .

* المطاعم فى الاسكندرية 

أكيد بعد ما نزلنا البحر نكون جعانين فحقترح عليكم شوية مطاعم ممكن تعجبكم 
 طبعا المطاعم فى الاسكندرية كتير فى منها المشهور وفى منها الخاص بالاسكندرية

وطبعا كلنا عارفين المطاعم دى 

-  مطاعم مؤمن           - كوك دور       - chilis                
- مطاعم كنتاكى          - هارديز           - ولعتين
- بيتزا هت                - ماكدونالز        - papa jhones

المطاعم الخاصة بالاسكندرية 

 - مطعم حسنى 

لو أنت أكيل ويتحب الاكل يبقى لازم تروح مطعم حسنى عشان حتلاقى كل المشويات والمحاشى والممبارو كمان عندة أسماك كل حاجة واكلة جميل جدا والفرع بتاع المحل فى المندرة جنب المنتزة .

العنوان: ش جمال عبد الناصر، الإسكندرية


- مطعم بلبع

 من المطاعم المميزة بالاسكندرية والخاصة بالمشويات أيضأ


العنوان:
        سيدي بشر : 154 شارع ملك حفنى ، بجانب المنتزة 




انا جربت مطعم حسنى وبلبع ولكن بحب مطعم حسنى أكتر 😀😀😀

- مطعم قدورة للمأكولات البحرية 

من احسن المطاعم فى الاسماك المشوية وكمان شوربة السى فود اللذيذة والسبيط والجمبرى وكل الى نفسك فية 😉😉😉

كل الى عليك تختار السمك والجمبرى وهو بيكون طازج على فكرة ويقوم افضل الشيفات فى المطعم بطبخها خصيصا لك 

العنوان: المندرة بحري، Qesm Al Montazah, الإسكندرية

وبعد ما نزلنا البحر واتغدينا ممكن بقى نتفسح اعتقد كدة ممكن تكون الساعة 5 العصر مثلا لسة اليوم فى وقت  كبيييير☺☺☺☺☺

 *ممكن بقى نروح مول مثلا 

طبعا لسة الوقت كتير قدمنا فى الاسكندرية احسن مولات 

 (  مول سان استيفانو )

مول سان استيفانو من المولات الجميلة والنظيفة فى الاسكندرية ويوجد بداخل أعلى 

مبنى فى مدينة الاسكندرية حيث يبلغ ارتفاع المبنى ثلاثون طابق ويعتبر من أحلى 

المبانى فى الاسكندرية فى تصميمة .

وكمان المول يضم العديد من التوكيلات التجارية الشهيرة وفى سينمات ومطاعم 

وكل الى نفسك فية .

وكمان من السهل جدا انك تروح المول من اى مكان فى الاسكندرية لان موقع 

المول فى وسط الاسكندرية وعلى البحر مباشرة من السهل الوصل الية من محطة 

سيدى جابر والتى تبعد عنة 3 كيلو متر فقط يعنى ممكن ناخد المسافة فى ربع ساعة 

تقريبا .

انصح الجميع الذهاب الى المول لانة فعلا حينبسط 

وكمان ممكن ندخل سينما فى سان استيفانو مول حتلاقى معظم الافلام المعروضة 

جديدة افلام عربى او اجنبى وكمان فى افلام 3D

 ( كارفور سيتى سنتر )

 كارفور من احسن الاماكن فى الاسكندرية عشان فى كل حاجة دة غير السيتى سنتر من الداخل يحتوى ايضا على معظم الماركات التجارية اكتر من سان استيفانو 

ازاى بقى نروح كارفور سيتى سنتر 

 * لو معاك عربية ممكن تستخدم (GPS) وحيساعدك جامد عشان هو مش بعيد 

   والطريق واضح وبسيط

* لكن لو حتركب موصلات ممكن ميكروباص يكون رايح محطة مصر 

بعديها اركب ميكروباص  لكارفور 

كارفور اسكندرية جميل وفى كل حاجة بس لو انت قررت تنهى الرحلة يبقى روح

 كارفور وبعديها حتطلع تركب من قدام كارفور محطة مصر وترجع بألف سلامة 

اما لو لسة ناوى تسهر وتكمل اليوم خليك فى سان استيفانو مول عشان هو داخل 

المدينة .

ودى شوية صور لكارفور وسيتى سنتر 

وبكدة احنا عملنا حجات كتير كدة بقى ممكن ترجع او تكمل لو عايز تكمل حتتأخر 

شوية بس طبعا الاسكندرية باليل حاجة تانية خالص .

لو حتكمل اليوم ركز معايا عشان مفجائات باليل حاجة تانية خالص 

دلوقتى ممكن تكون الساعة 8 او 9 ليلا 

الاسكندرية باليل بتكون جميلة جدا وخاصا البحر بجد حاجة تانية خاااالص 

احلى حاجة تعملها فى التوقيت دة انك تتمشى على الكورنيش ممكن تأكل درة 

بيبقى طعمة جميل على الممشى 

مش معقول تكون فى الاسكندرية ومتشتريش أيس كريم من هناك

الايس كريم فى الاسكندرية 

الايس كريم هناك حاجة تانية خالص فى محلات كتير مخصصة لايس كريم بيعملوا 

بشكل مختلف ولة طعم تانى خاصا مع البحر 

فى هناك محلات كثير جدا لبيع الايس كريم 

* ايس كريم عزة           * ايس كريم النظامى 

* ايس كريم مكرم          * ايس كريم الشيخ وفيق 

انا جربتهم كلهم عزة مشهور جدا هناك ولكن ليس الاحسن انا افضل النظامى 

لانة جنب القلعة فطبعا حتأكل الايس كريم وتتمشى الى القلعة 

الاسكندرية ليلا مع الايس كريم والبحر عند القلعة بجد شعور مختلف جدا 

ودى شوية صور للاسكندرية ليلا .

طبعا الشعور مختلف الاسكندرية ليلا عن الصباح لو بتحب الهدوء والاستكنيصة يبقى لازم تروح وتفضل لغاية باليل لو بقى مستعجل ممكن تيجى مرة تانية بس لازم تجربها لانك بجد حتنبسط جدا

على العموم الاسكندرية جميلة جدا وفيها مزارات وفسح كتير جدا ولكن أنا 

اختصرت الفسح على قد ما اقدر لان انا قايل من الاول اننا حنروح ونرجع فى يوم 

واحد وبعدين انا شرحت بدائل كتير مش شرط نعملهم كلهم احنا نختار البديل 

المناسب لنا ويارب يكون الموضوع نال اعجابكم .